Dilli Ki Sardi

TADPAYE TARSAYE RE DILLI KI SARDI

Ek kalpanik anubhuti ki abhivyakti

Raat ke barah baje jab ek naye din ka agaaz ho raha tha, Dilli ki sardi ki badan se rumaniyat badhti jaa rahi thi. Sardi itni ki tapte jism pe rakha paara bhi pighalne se inkaar kar de. Binaa gloves angulian jakad chuki thin, Dil dhadakne mein michauli kar raha tha. Har beetta pal ummeed ke sahare tha, is raah ko paar kar jane ki. Bus-Auto to band the aaj(Delhi-UP Bus issue), par mere liye nikalna jaroori tha. Kisi manjil ko mera intezaar tha aur lautne mein raat kaafi ho chuki thi.

Bike 80 ki gati se sunsaan sadak par daud rahi thi. Gati kam karne ki haaton mein jaan nahi bachi the, sab kuch mano jam gaya tha. Himadri pe giri barf ki sheetalta dilli ki fizaa mein samahit ho chuki thi. Dimag ki aur rakt-pravaah rukk hi gaya tha. Koi lakshya nahi, koi manas nahi, bas swachalit vaahan aur us par sawar do insaan...jinki nason mein rakh pravaah tham chuka tha. Saans sirf isi ummeed mein chal rahi thi ki shaayad bike jaldi hi gantavya par pahunchegi jahan kisi tarah kuch garmi ka bandobast ho sakega aur ye tut-ti saansein vapas aa jayengi.

Kahte hein ki jab prakruti pareeksha leti hai to uske aage sab baune pad jaate hai. Kisi manas mein use vashibhoot karne ka samarthya nahi hota, koi manaswee use nahi bahla sakta. Wohi hua bhi. Prakriti ke is karya-abhyas mein naya pareekshan hua. Tej daudti bike ke rukne ke sahare ne dam tod diyaa. Brake fail, ab kyaa.. sab khatam?

Par jeevan mein jab prakriti apni hadein paar kar leti hai tab avtaar hota hai param pita ke maaya-jaal ka, jismein fans ka prakriti ka har upaay jakad kar rah jata hai. Naa jane kahan se shiraon(veins) mein rakh sanchaar hua, badan mein ek asamayik ushma utpann hui. Tham chuke manaswee ke manas mein bijli kaundhi. Chetna shunya mann mein vicharon ne janm lena prarambh kiya.

Samast ghatnakram, asman mein badlon ki gunj ki bhati mastishk mein dohraya gaya. Mein use nahi jane de sakta. Use jeena hai, nayi uchaion ko paane ki khatir, sapno ko udaan dene ke liye, dunia jeetne ke liye. Nahin. Mein use is tarah khatam nahi hone dunga. Ye yuddh mujhe jeetna hi hai. Aaj jeevan mrityu se is kadar bebasi se nahi haar sakta, dhadkano ke rukne se pahle ye mrityu ka naya rupp aaj mujhe nahi haraa payega. Is ghatnakrum se anjaan thand se simti si baithi thi wo. Shayad sardi ki vajah se mujhe kas ke bheench liya tha usne.

Durr kahin ek rett ka dher nazar aaya. Haathon mein hilne ki shakti juta kar bike ki disha us taraf kar di. Bas ab jo karna the us rett ke dher ko karna tha. Uske haath par haath rakhkar aankhein band kar lin thi maine. Achanak hi ek thokar lagi aur ek pal bhi nahi lagaa hoga hamen uchhal kar ret ke us dher mein girte. Manaswee kuch palon ke liye behosh tha, jhatke se uski chetna shaayad laut aayi thi. Jab aankhen khuli to uski aankhon mein kayi sawaal the, mere labon par halki muskaan thi jo shaayad use chidha rahi thi. Usko kaise bataun ki is rett ne hi aaj nayaa jeevan pradaan kiyaa tha. Uski narazgi jayaj thi...mein itna laparwahi se bike kaise chala sakta hunn ki mujhe saamne padaa rett ka dher hi nahi dikha...par mein maun tha aur hun. Sab maya hai prabhu ki aur Dilli Ki Sardi ki.