Kal unchi imaraton ke sahare se gujarte hua abhaas hua ki jindagi kitni teevrata se aage badhti jaa rahi hai. Abhi kal hi to is shahar mein aaya tha, kuch sapney sanjoye kai ummeedein liye. Prayaas tha jeevan ko ek mukkamaljahan mein bitane ka, in imaraton ki uchaion ko paar karne ka. Socha nahi tha ki samay itni tezi se beetega. Suna tha ki ek samay ke baad jeevan mein mukkamal rasta haasil ho jata hai, jahan se ehsaas hona prarambh hota haiki yahi meri chahat thi aur mein sahi disha mein jaa raha huun. Par abhi tak aisa kuch mahsoos nahi ho paa raha hai. Soch thi ki shayad mein hi ek aisa hunn jo is pashopesh mein padaa hai ki kyaa waakai ye jindagi hai jiska maine khwab dekhe the. Jab imaraton se nazar ghuma kar dekha to nazar aye kai dishaviheen, lakshya se bhatke hue log jinhone shaayad isi ko niyati maan kar jeeven jeene ka nischay kar liya tha. Kunn manuj ke bhav samay ke saath khseen padte jate hain, kuch hum laksh-viheen ho kar jeevan bhar kisi aur dwara taya kiye gaye lakshon ki prapti ko apna jeevan maan baithte hain. Ghar pahuncha to SRK ki chhote parde pe vaapasi ki taiyari ki bhumika taya ki jaa rahi thi. 'Kuch sawaal aise hote hain jo jindagi badal dete hain!' Kitni saarthak hai ye baat, par shart yahi hai ki un sawalon ke jawaab dhundhne ke liye prayaskiya jaye, haath-pair maare jayen. Paani ki nirantar girti bund to pashaan mein bhi sthan banane ka samarthya rakhti hai.Phir hum kunn apne lakshya ko aise hi jane dete hain, kunn karmvaadi na hokar bhagyavaadi ho jate hain. Kunn har maah ki aakhiridin salary ke cheque ko hi apni kabiliyat ka purna bhugtaan maan kar santusht ho jate hain. Achanak chali thandi hawaa ne khidki ke raaste aakar badan mein sihran paida kar meri tandra bhang ki, saamne sach tha.Aaj phir apne us manuvaadi hisse ko unhi imaraton mein kaid karke aaya hunn, sochunga ki kyaa paaya hai is beete varsh mein. Ek nayaa saal aagaaz karne ko hai, naye pran liye jayenge, unhe nibhayenge bhi, kuch ghante, kuch din ya phir kuhch hafte.
Su-Swagatam Nav Varsh.
Comments